કેન્દ્રીય માધ્યમિક શિક્ષણ બોર્ડ (CBSE) દ્વારા આજે ધોરણ-10નું પરિણામ જાહેર કરવામાં આવ્યું છે, જેમાં આ વર્ષે પણ વિદ્યાર્થીઓએ ઉત્કૃષ્ટ પ્રદર્શન કર્યું છે. કુલ 26 લાખથી વધુ ઉમેદવારોમાંથી અંદાજિત 93.6 ટકા વિદ્યાર્થીઓ સફળ રહ્યા છે. વિદ્યાર્થીઓ પોતાનું પરિણામ બોર્ડની સત્તાવાર વેબસાઈટ results.cbse.nic.in તેમજ cbse.gov.in પર સરળતાથી ચેક કરી શકે છે.
પરિણામોમાં દર વર્ષની જેમ આ વર્ષે પણ દીકરીઓએ મેદાન માર્યું છે. વિદ્યાર્થીઓની સરખામણીએ વિદ્યાર્થીનીઓની પાસ ટકાવારી વધુ નોંધાઈ છે, જે તેમની સતત મહેનત અને પ્રગતિને દર્શાવે છે. જોકે બોર્ડ દ્વારા આ વખતે સત્તાવાર ટોપર લિસ્ટ જાહેર કરવામાં આવ્યું નથી, પરંતુ વિષયવાર શ્રેષ્ઠ પ્રદર્શન કરનાર વિદ્યાર્થીઓને મેરિટ સર્ટિફિકેટ આપવામાં આવશે.
વેબસાઈટ પર વધુ ટ્રાફિકને ધ્યાનમાં રાખીને વિદ્યાર્થીઓ માટે વૈકલ્પિક વ્યવસ્થા પણ રાખવામાં આવી છે. DigiLocker અને UMANG એપ દ્વારા વિદ્યાર્થીઓ પોતાની ડિજિટલ માર્કશીટ સરળતાથી ડાઉનલોડ કરી શકે છે. ખાસ કરીને UMANG એપ પર સૌથી પહેલા રિઝલ્ટ લિંક સક્રિય કરવામાં આવી હતી.
વિદ્યાર્થીઓને સલાહ આપવામાં આવે છે કે તેઓ સત્તાવાર વેબસાઈટ પર જઈ ‘Secondary School Examination (Class X) 2026’ લિંક પર ક્લિક કરીને પોતાનો રોલ નંબર, સ્કૂલ નંબર અને એડમિટ કાર્ડ આઈડી દાખલ કરીને પરિણામ ચેક કરે. પરિણામને ભવિષ્ય માટે ડાઉનલોડ અને પ્રિન્ટ કરવું પણ જરૂરી છે.
જે વિદ્યાર્થીઓ એક અથવા બે વિષયોમાં સફળ થયા નથી અથવા પોતાના પરિણામથી સંતુષ્ટ નથી, તેઓ માટે બોર્ડ દ્વારા ફરી એક તક આપવામાં આવી છે. CBSE દ્વારા 15 મે 2026થી ‘સેકન્ડ બોર્ડ એક્ઝામ’ યોજવાનું આયોજન કરવામાં આવ્યું છે, જેના માટે ટૂંક સમયમાં અરજી પ્રક્રિયા શરૂ થશે.
