ગાંધીનગર: ગુજરાતના શિક્ષિત બેરોજગાર યુવાનો માટે સરકારી નોકરી મેળવવાની સુવર્ણ તક આવી ગઈ છે. રાજ્ય સરકારના શિક્ષણ વિભાગ દ્વારા સરકારી અને ગ્રાન્ટ-ઇન-એઇડ શાળાઓમાં કુલ 1,141 વ્યાયામ શિક્ષકોની સીધી ભરતી કરવાની મહત્વની જાહેરાત કરવામાં આવી છે. મુખ્યમંત્રીની મંજૂરી મળ્યા બાદ હવે ટૂંક સમયમાં જ આ ભરતી પ્રક્રિયાનો પ્રારંભ કરવામાં આવશે, જેનો મુખ્ય હેતુ શાળાઓમાં રમતગમત અને શારીરિક શિક્ષણને વેગ આપવાનો છે.
આ ભરતી પ્રક્રિયા ધોરણ 6 થી 8 માટે હાથ ધરવામાં આવશે. આમાં ઉમેદવારોની પસંદગી રાજ્ય પરીક્ષા બોર્ડ દ્વારા લેવામાં આવતી SAT (Physical Education) પરીક્ષાના મેરીટના આધારે કરવામાં આવશે. જે ઉમેદવારોએ આ પરીક્ષા પાસ કરી હશે, તેઓ મેરીટ યાદીમાં સ્થાન મેળવી શકશે. લાંબા સમય બાદ શારીરિક શિક્ષણના ક્ષેત્રમાં આટલી મોટી સંખ્યામાં ભરતી થવા જઈ રહી હોવાથી ઉમેદવારોમાં ઉત્સાહ જોવા મળી રહ્યો છે.
સરકાર દ્વારા ભરતી માટે વયમર્યાદા પણ નક્કી કરવામાં આવી છે. સામાન્ય વર્ગના ઉમેદવારો માટે મહત્તમ વયમર્યાદા 38 વર્ષ રાખવામાં આવી છે. જોકે, અનામત વર્ગના (SC/ST/OBC/EWS) ઉમેદવારોને નિયમ મુજબ 5 વર્ષની છૂટ આપીને 43 વર્ષ સુધીની મર્યાદા નક્કી કરાઈ છે. જ્યારે અનામત વર્ગની મહિલા ઉમેદવારો માટે આ મર્યાદા 48 વર્ષ સુધીની રાખવામાં આવી છે, જે મહિલા ઉમેદવારો માટે એક મોટી તક સાબિત થશે.
ભરતી માટે ઉમેદવાર પાસે માન્ય યુનિવર્સિટીની સ્નાતક ડિગ્રીની સાથે શારીરિક શિક્ષણના સ્પેશિયલ કોર્સ જેવા કે C.P.Ed, B.P.Ed અથવા D.P.Edની લાયકાત હોવી અનિવાર્ય છે. પસંદગી પામેલા ઉમેદવારોને સરકારના પ્રવર્તમાન નિયમો મુજબ પ્રથમ પાંચ વર્ષ માટે ફિક્સ પગાર પર નિમણૂક આપવામાં આવશે. પાંચ વર્ષની સંતોષકારક સેવા પૂર્ણ કર્યા બાદ તેઓને નિયમિત પગારધોરણના તમામ લાભો મળવાપાત્ર થશે.
