હ્યુમન ટ્રાફિકિંગના ચંગુલમાં ફસાઈ હોવાની આશંકા વચ્ચે આણંદની બે સગી બહેનોનો થયો સુરક્ષિત રેસ્ક્યુ
પરિવારનો દાવો : નોકરીના નામે વિદેશ મોકલાયેલી બે દીકરીઓ અચાનક સંપર્કવિહોણી બની ગઈ હતી
ભારત સરકાર, વિદેશ મંત્રાલય અને આણંદના સાંસદ મિતેશ પટેલના પ્રયાસોથી 'ઓપરેશન મહીસાગર 2.0' બન્યું આશાનું કિરણ
● 20 દિવસ સુધી દીકરીઓનો કોઈ સંપર્ક નહીં...
- પરિવાર પર તૂટી પડ્યું દુઃખનું આભ!
આણંદ જિલ્લાના બોરસદ તાલુકાની બે સગી બહેનો રોજગારની આશા સાથે થાઈલેન્ડ પહોંચી હતી. પરંતુ અચાનક બંનેનો પરિવાર સાથેનો સંપર્ક તૂટી ગયો. દિવસો પસાર થતા ગયા, ફોન બંધ આવવા લાગ્યા, કોઈ માહિતી મળતી ન હતી. પરિવારના જણાવ્યા અનુસાર બંને દીકરીઓ લાઓસ સુધી પહોંચી ગઈ હોવાની માહિતી મળી હતી. દીકરીઓ સુરક્ષિત છે કે નહીં? ક્યાં છે? કોની સાથે છે? આવા અનેક પ્રશ્નો પરિવારને દિવસ-રાત સતાવી રહ્યા હતા.
● પરિવારની એક અપીલ અને શરૂ થયું 'ઓપરેશન મહીસાગર 2.0'
- જ્યારે તમામ પ્રયાસો નિષ્ફળ ગયા ત્યારે પરિવારે આણંદ લોકસભાના સાંસદ મિતેશભાઈ પટેલનો સંપર્ક કર્યો. પરિવારની વ્યથા સાંભળ્યા બાદ સાંસદ મિતેશ પટેલે તાત્કાલિક ભારત સરકાર, વિદેશ મંત્રાલય અને ભારતીય દૂતાવાસ સાથે સંપર્ક સાધ્યો. સતત ફોલોઅપ, સંકલન અને પ્રયત્નોના પરિણામે બંને દીકરીઓ સુધી પહોંચવાનો માર્ગ ખુલ્યો અને આખરે સફળ રેસ્ક્યુ ઓપરેશન પાર પડ્યું.
આણંદ, 05 જુન
વિદેશમાં સારી નોકરી, આર્થિક રીતે સશક્ત ભવિષ્ય અને પરિવારના સપનાઓને સાકાર કરવાની આશા સાથે ઘરેથી નીકળેલી આણંદ જિલ્લાના બોરસદ તાલુકાની બે સગી બહેનો માટે વિદેશની સફર જીવનનો સૌથી ભયાનક અનુભવ બની ગઈ હોવાનું પરિવાર જણાવી રહ્યો છે.
પરિવારના જણાવ્યા મુજબ બંને બહેનો રોજગાર માટે થાઈલેન્ડ ગઈ હતી. શરૂઆતમાં પરિવાર સાથે વાતચીત થતી હતી, પરંતુ થોડા સમય બાદ અચાનક બંનેનો સંપર્ક તૂટી ગયો. લગભગ 20 દિવસ સુધી કોઈ ફોન નહીં, કોઈ મેસેજ નહીં અને કોઈ માહિતી નહીં.
પરિવારના સભ્યો માટે આ સમયગાળો અસહ્ય બની ગયો હતો. દરેક ફોનની રિંગમાં દીકરીઓની આશા, દરેક અજાણી કોલમાં કોઈ સારા સમાચારની અપેક્ષા અને દરેક પસાર થતા દિવસે વધતી જતી ચિંતા...
પરિવારનો દાવો છે કે બંને દીકરીઓ કોઈ આંતરરાષ્ટ્રીય હ્યુમન ટ્રાફિકિંગ નેટવર્કના ચંગુલમાં ફસાઈ ગઈ હતી. જોકે સમગ્ર ઘટનાની હકીકત બંને બહેનો ભારત પરત ફર્યા બાદ જ સ્પષ્ટ થઈ શકશે.
દીકરીઓનો કોઈ પત્તો ન મળતા આખરે પરિવાર આણંદના સાંસદ મિતેશ પટેલ સુધી પહોંચ્યો. પરિવારની પીડા સાંભળ્યા બાદ સાંસદ મિતેશ પટેલે આ મામલાને માત્ર એક અરજી તરીકે નહીં પરંતુ બે ભારતીય દીકરીઓના જીવન સાથે જોડાયેલા ગંભીર માનવતાના પ્રશ્ન તરીકે લીધો.
સાંસદ મિતેશ પટેલે ભારત સરકારના વિદેશ મંત્રાલય, ભારતીય દૂતાવાસ અને સંબંધિત એજન્સીઓ સાથે સતત સંપર્ક જાળવી રાખ્યો. આ સમગ્ર મિશન દરમિયાન અનેક સ્તરે સંકલન અને પ્રયાસો કરવામાં આવ્યા હતા.
આખરે ભારત સરકારના પ્રયાસો, ભારતીય દૂતાવાસની કામગીરી અને સ્થાનિક એજન્સીઓના સહયોગથી બંને બહેનો સુધી પહોંચવામાં સફળતા મળી અને તેમનો સુરક્ષિત રેસ્ક્યુ કરવામાં આવ્યો.
રેસ્ક્યુ બાદ જ્યારે બંને બહેનોની પરિવાર સાથે વાતચીત કરાવવામાં આવી ત્યારે પરિવાર માટે તે ક્ષણ લાગણીઓથી ભરેલી હતી. છેલ્લા 20 દિવસથી જે અવાજ સાંભળવા પરિવાર તરસી રહ્યો હતો તે અવાજ ફરી સાંભળતા પરિવારજનોની આંખોમાં આંસુ આવી ગયા હતા.
આ સમગ્ર ઘટનાએ એક વખત ફરી ચેતવણી આપી છે કે વિદેશમાં નોકરીના નામે થતી છેતરપિંડી અને શંકાસ્પદ એજન્ટોથી સાવધાન રહેવું અત્યંત જરૂરી છે. કોઈપણ વ્યક્તિએ વિદેશ જતાં પહેલાં કંપની, વિઝા, કોન્ટ્રાક્ટ, એજન્ટ અને સ્થાનિક સરનામાની સંપૂર્ણ ચકાસણી કરવી જોઈએ.
આણંદની આ બે સગી બહેનો આજે સુરક્ષિત છે. પરિવાર રાહ જોઈ રહ્યો છે કે ક્યારે તેમની દીકરીઓ વતનની ધરતી પર પગ મૂકે અને ક્યારે તેઓ તેમને ગળે લગાવી શકે.
પરંતુ આ કહાનીનો સૌથી મહત્વનો ભાગ હજુ બાકી છે...
પરિવારનું માનવું છે કે બંને બહેનો ભારત પરત ફર્યા બાદ સમગ્ર ઘટનાક્રમ અંગે અનેક ચોંકાવનારા ખુલાસાઓ સામે આવી શકે છે. આખરે થાઈલેન્ડથી લાઓસ સુધીની આ સફર કેવી રીતે પહોંચી? કોના મારફતે પહોંચી? અને આ 20 દિવસ દરમિયાન તેમની સાથે શું બન્યું?
આ તમામ સવાલોના જવાબ કદાચ તેમની વતન વાપસી બાદ જ સામે આવશે.
હાલ માટે એક વાત ચોક્કસ છે...
બે ગુજરાતી દીકરીઓ સુરક્ષિત છે... પરિવારને પોતાની દીકરીઓ ફરી મળી છે... અને 'ઓપરેશન મહીસાગર 2.0' અનેક પરિવારો માટે આશા અને વિશ્વાસનું પ્રતિક બનીને સામે આવ્યું છે.