ઉમરેઠ વિધાનસભાની પેટાચૂંટણીની મતગણતરી દરમિયાન શરૂઆતથી જ ભાજપના ઉમેદવાર હર્ષદ પરમાર મજબૂત લીડ સાથે આગળ ચાલી રહ્યા છે. પ્રથમ ત્રણ રાઉન્ડના અંતે તેમણે કોંગ્રેસના ઉમેદવાર ભૃગૃરાજસિંહ ચૌહાણ સામે અંદાજે 6000 મતોથી આગળ વધતાની સાથે સ્પષ્ટ લીડ મેળવી હતી, જેનાથી ભાજપે શરૂઆતમાં જ પોતાની સ્થિતિ મજબૂત બનાવી દીધી હતી.
ચોથા રાઉન્ડ સુધી પહોંચતા ભાજપની લીડમાં વધુ વધારો જોવા મળ્યો હતો. આ તબક્કે હર્ષદ પરમારને 16,671 મત મળ્યા હતા જ્યારે કોંગ્રેસના ભૃગૃરાજસિંહ ચૌહાણને 9,350 મત મળ્યા હતા, એટલે કે ભાજપ લગભગ 7,281 મતોથી આગળ હતો. પાંચમા રાઉન્ડના અંતે ભાજપની લીડ દસ હજારને પાર પહોંચી ગઈ હતી. હર્ષદ પરમારને 21,111 મત મળ્યા હતા અને કોંગ્રેસને 11,097 મત મળતા ભાજપ 10,014 મતોથી આગળ રહ્યો હતો. આ સાથે ભાજપના કાર્યકર્તાઓમાં ઉત્સાહનો માહોલ જોવા મળ્યો હતો.
છઠ્ઠા રાઉન્ડમાં પણ ભાજપની લીડ સતત વધતી રહી અને હર્ષદ પરમાર 12,176 મતોથી આગળ રહ્યા હતા. તેમને કુલ 25,217 મત મળ્યા હતા જ્યારે કોંગ્રેસના ઉમેદવારને 13,041 મત મળ્યા હતા. આમ શરૂઆતથી જ ભાજપ કોંગ્રેસને પછાડતું રહ્યું હતું અને લીડ વધુ મજબૂત બનતી ગઈ હતી.
જોકે સાતમા રાઉન્ડમાં ભાજપની લીડમાં થોડી ઘટાડો નોંધાયો હતો. આ રાઉન્ડમાં હર્ષદ પરમાર 7,142 મતોથી આગળ રહ્યા હતા. તેમને 25,961 મત મળ્યા હતા જ્યારે કોંગ્રેસના ઉમેદવાર ભૃગૃરાજસિંહ ચૌહાણે 18,819 મત મેળવ્યા હતા, જેનાથી સ્પર્ધા થોડી ટક્કરભરી બનતી દેખાઈ હતી.
પરંતુ આઠમા રાઉન્ડમાં ફરી ભાજપે લીડમાં વધારો કર્યો હતો. હર્ષદ પરમાર 8,775 મતોથી આગળ રહ્યા હતા અને તેમને 30,089 મત મળ્યા હતા જ્યારે કોંગ્રેસના ઉમેદવારને 21,314 મત મળ્યા હતા. નવમા રાઉન્ડના અંતે ભાજપની લીડ ફરી દસ હજારને પાર પહોંચી ગઈ હતી. હર્ષદ પરમારને કુલ 33,745 મત મળ્યા હતા જ્યારે કોંગ્રેસના ઉમેદવારને 23,310 મત મળતા ભાજપ 10,435 મતોથી આગળ રહ્યો હતો.
આમ ઉમરેઠ પેટાચૂંટણીમાં ભાજપના ઉમેદવાર હર્ષદ પરમાર શરૂઆતથી જ લીડ જાળવી રાખતા દેખાઈ રહ્યા છે. વચ્ચે એક રાઉન્ડમાં ઘટાડો છતાં ભાજપ ફરી મજબૂતી સાથે આગળ વધ્યું છે, જેના કારણે અંતિમ પરિણામ તરફ હવે સૌની નજર કેન્દ્રિત થઈ છે.
